आन्दोलनरत यातायात व्यवसायी र सरकारबीच छलफल भइरहेको छ । गृहमन्त्री रमेश लेखक र व्यवसायीका प्रतिनिधिबीच छलफल भइरहेको छ ।

गण्डकी प्रदेश सरकारले ‘राइड शेयरिङ’ अर्थात् निजी गाडीलाई पनि यात्रु बोक्न वैधानिकता दिएको विरोधमा यातायात व्यवसायीले सार्वजनिक गाडी नचलाएपछि समस्या समाधानका लागि छलफल भएको हो ।

आज काठमाण्डौ उपत्यकासहित देशभर बस, माइक्रोबस, ट्याम्पोजस्ता सार्वजनिक गाडी नचल्दा काम विशेषले गन्तव्यमा पुग्नुपर्ने यात्रुलाई सास्ती भएको छ । बिरामी, वृद्धवृद्धा, विद्यार्थी र कर्मचारीले अझै धेरै सास्ती खेप्नुपरेको छ ।

कोही सडक छेउमा उभिएर बसको प्रतीक्षा गरिरहेका देखिन्छन् भने कोही निजी गाडीमा चढेर र कोही पैदलै हिँडिरहेका छन् ।

यसैबीच नेपाल प्रहरीले सार्वजनिक गाडी नचल्दा सर्वसाधारणलाई आवतजावत गर्न सहज होस् भन्ने उद्देश्यले आज काठमाण्डौको दुई वटा रुटमा निःशुल्क बस सेवा सञ्चालन गरेको छ ।

—